田北辰認為沙中綫工程醜聞令港鐵招牌盡毀。朱永倫攝

港鐵因沙中綫工程醜聞而招牌盡毀，當年沙中綫原本由九鐵投得，但港鐵過於霸道，拒絕與九鐵在金鐘站接駁，兩鐵合併後港鐵獨力負責高鐵、沙中綫等多項鐵路工程，最終導致「消化不良」。

田北辰透露，兩鐵合併其中一個原因與沙中綫接駁問題有關，2002年九鐵奪得沙中綫工程，「去到金鐘站，港鐵話我冇可能同你接駁，如果要接駁你要補貼畀我，如果唔係你哋（沙中綫乘客）要全部行出街，再行返入去（港鐵），咁死緊啦」。兩鐵合併後，沙中綫改由港鐵重新設計興建，才解決金鐘轉乘問題。

他又表示，高鐵及沙中綫工程先後出問題，原因是在同一時間要興建多項鐵路工程，「港鐵同時間食得太多嘢，消化不良」，興建鐵路與營運鐵路不同，太複雜令管理層難以兼顧，「今日如果九鐵起沙中綫，港鐵起高鐵，大家分擔一半，我相信唔係咁嘅局面」。

同時，高質素工程人才亦難求。他指出，不少工程管理人員都與承建商有千絲萬縷關係，當中未必一定涉及私利，但難免講關係，「同你合作開，緊係順利啲，大家拍吓膊頭搞掂佢」。

他已向政府建議，港鐵新行政總裁必須由本地工程背景人士出任，他反對再招聘海外人士，「見過鬼怕黑」，海外人士未必熟悉香港價值觀。他已推薦兩位工程界人士給政府，兩人都是尊重程序的專業人士，不會只「畀面」大承建商。

記者 麥志榮